Ester 04
01Dou Mordechai vernam wat ter aalmoal gebeurd was, scheurde hai zien klaaier en bedekte zok mit zak en aask. Hai laip dwaars deur stad en schraifde bitter, oet ale macht.
02Zo kwam e aan poort van keunenk tou, want in raauwklaaier mog men nait tou poort van keunenk inkommen.
03In ale gewesten doar lastgeven en wet van keunenk aankommen wazzen, was der daibe raauw onder Jeuden. Ze vastten, reerden en kluigen. Verschaaident legden zok deel in zak en aask.
04Dou Ester heur dainsters en hofdainders dit aan heur vertelden, wer keunegin slim kèl. Zai stuurde klaaier veur Mordechai om aan te trekken in stee van zien raauwklaid, mor hai nam ze nait aan.
05Dou luit Ester Hatach bie zok kommen, ain van keunenk zien hofdainders dij heur tousteld wazzen, en gaf hom odders om Mordechai te vroagen noar t hou en woarom.
06Hatach ging noar Mordechai op stadsploats boeten poort van keunenk,
07en Mordechai vertelde Hatach wat hom aalmoal overkommen was en ook houveul zulver Haman persies ofdroagen wol veur schatkist van keunenk, as pries om Jeuden oet te moorden.
08Hai gaf hom ook n ofschrift van wet dij in Susa oetgeven was, om heur oet te reuden. Dij mos e aan Ester zain loaten om heur op hoogte te brengen. Hai mos heur ook opdroagen om noar keunenk te goan en hom om genoade te smeken en veur heur volk tussenbaaident te kommen.
09Hatach ging noar binnen en brochde woorden van Mordechai over aan Ester.
10 Mor Ester gaf Hatach odders om tegen Mordechai te zeggen:
11 "Ale hofdainders van keunenk en bewoners van keunenk zien gewesten waiten dat as ter ain, of t nou n man of n vraauw is, ongevroagd bie keunenk in t binnenhof komt, dizze aine wet geldt: dij zel doodmoakt worden. Veur t levent blift allenneg spoard dij van keunenk golden scepter toulangd krigt. En ik bin al in gain datteg doagen bie keunenk roupen."
12 Dou men Mordechai dizze bosschop van Ester overbrocht haar,
13 luit Mordechai Ester as antwoord geven: "Verbeel die mor nait dastoe as ainegste van ale Jeuden ontkommen zelst, omreden dastoe woonst in t pelaais van keunenk.
14 Astoe in dizze tieden swigst, zel der veur Jeuden wel redden en oetkomst van aargenswoar aans kommen, mor doe en dien geslacht zellen om haals kommen. Wèl wait bistoe nou net keunegin worden mit t oog op n tied as dizzent."
15 Dou zee Ester dat men Mordechai as antwoord geven mos:
16 "Roup ale Jeuden dij in Susa touholden bie nkander en goa den vasten om mie te helpen: eet of drink nait, drij doagen achter mekoar, snaachts net zo min as overdag. Ik en mien dainsters zellen op aigenste menaaier vasten en den zel k noar keunenk goan, al is t verboden. Kom ik om, den kom ik om!"
17 Dou ging Mordechai vot en hai dee krekt wat Ester hom opdroagen haar.
|